Javier Olivares ilustratzailearen eta 2022ko otsailean hil zen Fernando Marías idazlearen arteko proiektu bat da. Hamalau urteko lana liburu batean geratu da jasota. Astiberrik bikain argitaratu du, eta hasiera batetik haren egileek amestu zuten erakusketaren katalogotzat har dezakegu. Pertierra askoz ere beranduago ezagutu genuen, gure Fernando Marías maitearen heriotzaren lehen urteurrenean hain justu. Txantxa literario bat zela ulertu genuen. Fernandok zaletasun handia zuen, eta nolabait ere jarraipena emateko eskatzen zitzaigun. Beraz, jokoa onartu genuen: erakusketak argia ikusiko zuen. Olivaresen laguntzaz jaialdiaren 14. ediziorako ekoiztu eta diseinatu dugun hau erakusketa ibiltaria izango da.
Nor zen Joaquín Pertierra? Bidaia honetan magia eta misterioa uztartuko dira, bizitzan irudiztatua eta erreala eskutik doazen hein berean. Irudimenaren ahalmenean oinarritzen den sortze-prozesuaren emaitza da erakusketa hau. Horretarako, Jaquín Pertierraren misterioan murgiltzen da. Javier Olivaresek ilustratzaile misteriotsua irudikatzeaz gainera, sortze-ahalegin izugarria egin zuen haren nortasun artistikoa biderkatu, edo behintzat, bikoitzeko.
Misterio grafiko eta literario horrek Pertierraren obraren parte garrantzitsu bat biltzen du: liburu enblematikoen eta diskoen azalak, aldizkarien azalak, komiki-orrialdeak, eta hainbat objektu eta material original. Lagun minak diren bi pertsonen arteko historia, «izaki erreal iheskor» batekin hirukote bihurtutakoa, eta omenaldi bikoitza ere bada: batetik, 40ko, 50eko eta 70eko hamarkadetako ilustratzaile ahaztuei eta, bestetik, idazle geldiezina eta kartsua izan zen Fernando Marías handiari.
‘Pertierra enigma’ Axular erakusketa-aretoan eta Bizkaia Aretoaren eranskinetan egongo da ikusgai, dohainik, irailaren 20tik urriaren 22ra arte. Era berean, erakusketatik hautatutako hamar irudi formatu handian ikusiko dira Bilboko metro-geltokien atondoetan, irailaren 15etik urriaren 31ra.